DİN ölkəboyu narkotik əməliyyatı keçirdi: həbs olunanlar var
Sumqayıt şəhərində narkotiklərlə bağlı əməliyyat keçirilib. Teleqraf.com xəbər verir ki, Sumqayıt şəhər Polis İdarəsinin 1-ci polis bölməsi əməkdaşlarının keçirdikləri əməliyyat-axtarış tədbirləri nəticəsində Corat qəsəbə sakini, əvvəllər məhkum olunmuş Əbülfəz Hüseynova məxsus həyətyanı sahədən kultivasiya yolu ilə yetişdirilmiş 36 ədəd çətənə kolu aşkar edilib.
Qax rayon polis şöbəsi də narkotiklərlə bağlı əməliyyat keçirib. Əməliyyat-axtarış tədbirləri nəticəsində Ağstafa rayon sakini, əvvəllər məhkum olunmuş Kərim Hüseynovdan 1 kiloqram 920 qram marixuana götürülüb. O, həbs edilib.
Daha bir narkotik əməliyyatı Yardımlı rayonu ərazisində keçirilib. Rayon polis şöbəsi, Dövlət Sərhəd Xidməti və Dövlət Təhlükəsizliyi Xidməti əməkdaşları tərəfindən rayonun Primbel və Arvana kəndləri ərazilərində yabanı halda bitmiş, ümumi çəkisi 4 ton 280 kiloqram olan 9270 ədəd çətənə kolu aşkar edərək məhv edib.
Lerik rayonunda da eyni tədbirlərlə bağlı əməliyyat keçirilib. Lerik rayon polis şöbəsi əməkdaşları Orand kəndi ərazisindən yabanı halda bitmiş, ümumi çəkisi 4 ton 610 kiloqram olan 10435 ədəd xaş-xaş kolu aşkar edib.
Bundan başqa, Balakən rayon polis şöbəsi əməkdaşlarının həyata keçirdikləri əməliyyat-axtarış tədbirləri nəticəsində şəhər sakini Nurullah Əliyevin həyətindən kultivasiya yolu ilə yetişdirilmiş 24 çətənə kolu aşkar edilərək götürülüb.
Daha bir əməliyyat Siyəzən rayonunda keçirilib. Polis əməkdaşlarının əməliyyat-axtarış tədbirləri nəticəsində Qalaşıxlı kəndində yaşayan Eltifat Hüseynovun həyətindən kultivasiya yolu ilə yetişdirilmiş 55 çətənə kolu aşkar edilib.
