İngilislərin Tofiq Bəhramova qızıl borcu təsdiqləndi - VİDEO
Britaniyanın "Skay Sports" kanalı İngiltərə yığmasının dünya çempionluğunun 50 illiyinə həsr olunmuş 50 saatlıq layihəni təqdim edib. 1966-cı ildə "Uembli" stadionunda keçirilmiş final matçında ingilislər Almaniya Federativ Respublikasını əlavə vaxtda 4-2 hesabı ilə məğlub etmişdi.
Oyun Ceffri Herstin het-triki ilə yadda qalıb. Lakin bu günə qədər unudulmayan və mübahisə mövzusuna çevrilən məqam hesab bərabər olarkən vurulan qoldu. Əlavə vaxtın 11-ci dəqiqəsində Herstin zərbəsindən sonra top tirin aşağı hissəsinə düşdü. Görüşün baş hakimi Qotfrid Dinst şübhələnərək yan xətti hakimi Tofiq Bəhramova müraciət etmişdi. Həmyerlimiz isə qətiyyətlə topun qapı xəttini keçdiyini bildirmişdi.
Bütün dünyada azarkeşlər indiyədək bu mübahisəli epizod barədə danışırlar. Nəhayət ki, həmin məqama aydınlıq gəlib. "Skay Sports" müasir texnologiyaların köməyilə topun qapı xəttini keçib-keçmədiyini müəyyənləşdirib. Kanalın daimi ekspertləri Ceymi Karrager və Ed Çemberlen epizodu dəqiqliyinə qədər təhlil ediblər. Müasir texnologiya ilə aparılan araşdırma Tofiq Bəhramovu haqlı çıxarıb.
"Texnologiya vasitəsilə birdəfəlik sübuta yetirdik ki, həmin epizodda top qapı xəttini keçib. Bu isə o deməkdi ki, laynsman Tofiq Bəhramovun qərarı doğrudu. Almanlar həmin qolla bağlı bir daha şikayətlənə bilməzlər", - Ceymi Karrager deyib.
