“Parkinq qiymətlərinin yüksək olması ciddi soyğunçuluqdur” - Deputat
Bu sözləri Yenisabah.az-a açıqlamasında Milli Məclisin deputatı, Böyük Quruluş Partiyasının (BQP) sədri Fazil Mustafa deyib.
O, paytaxt keçələrində artıq fəaliyyətə başlamış ödənişli parkinq xidmətlərinin qiymətlərindən söz açıb.
Xatırladaq ki, qiymətlərin zonalara görə fərqli olması sosial şəbəkələrdə və ictimaiyyətdə geniş tənqidə səbəb olub. Belə ki, insanlar ödənişli parkinq xidmətinin saatının 70 qəpik-1 AZN olmasının büdcələrinə ziyan olduğunu dilə gətirərək, bununla bağlı xüsusi tədbirlərin olmasını tələb ediblər.
Qiymətlərin saata nisbətən yüksək olduğunu dilə gətirən F. Mustafa isə bildirib ki, parkinq müddətinin 1 saat/1 manat üzərində qurulması vətəndaş üçün böyük problem yaradır:
“O baxımdan da bu məsələdə mütləq qayda-qanun yaradılmalı, bu kimi soyğunçuluq əməllərinə yol verilməməlidir. Çünki bəzən elə olur ki, vətəndaşların qısamüddətli avtomobillərini saxlaması bir sıra problemlərə gətirib çıxarır”.
BQP sədri təklif edib ki, dayanacaqların hamısı əlverişli şərtlərdə olmalıdır:
“Ona görə ki, bu məsələ işləyən insanlar üçün ciddi narahatlıq yaradır. Adam var ki, 8/100 saatlıq iş rejimi var. Əgər belədirsə, aylıq abunə formasında bu şəxslərə xüsusi bir sənəd verilməli, yəni imtiyazlı parkinqdən istifadə müddəti yaradılmalıdır. Yox, bunu etmirlərsə, onda insanları əziyyətə salmağa dəyməz. Çünki bu, hər şeydən əvvəl insanların ciddi şəkildə öz problemlərini həll etməsinə imkan verməyəcək”.
