“Çudo Peçka”da qiyam gözlənilir, işçilər maaşsız qalıb
Binəqədi rayonu, Cəfər Xəndan 36 a küçəsində yerləşən “Çudo peçka” mağazasının işçiləri 6 aydır ki maaş almırlar
Bu barədə mağazada çalışan İmran Rzayev məlumat verib:
“Bizə deyirlər ki pul yoxdur. Hərdənbir 10-20 manat pul verirlər. O pulla ailə dolandırmaq olar? Əlacımız olmadığı üçün işləməyə davam edirik. Problemlə bağlı Binəqədi rayon məhkəməsinə də müraciət etmişik. İşə hazırda məhkəmədə baxılır”.
Amma sən demə, məsələ bir mağazayla kifayətlənmirmiş. PİA.AZ-a daxil olan məlumata görə, “Çudo Peçka”nını əksər mağazalarında işçilər aylardır maaş üzü görmürlər. İşçilərə vəd verirlər ki, yaya mövsümü olduğuna görə, satış aşağı düşüb. Amma söhbət ondan gedir ki, fevral ayından bəri işçilər bir köpük yiyəsi deyillər. Redaksiymıza daxil olan məlumata görə, “Çudo Peçka”nın işçiləri əməkhaqlarının verilməməsi ilə bağlı piket keçirmək niyyətindədirlər.
“Biz bütün medianı və TV-ləri dəvət edəcəyik. Məqsədimiz odur ki, çəkib göstərsinlər. Cəlilovlar başımıza oyun açır. Deyirlər pul yoxdu. Şirniyyat aparın satın. Məktəbə gedəsi uşaqlarımız var. Dərs başlayır, bunları belə nəzərə almırlar”, deyə İmran Rzayev bildirib.
