Ceyhun Osmanlı danışdı: "namizəd olmayacam"
Millət vəkili Ceyhun Osmanlı öz dairəsindən deputatlığa namizədliyini irəli sürməyəcək
GUNDEMİNFO.AZ xəbər verir ki, o bu barədə “Qafqazinfo”ya açıqlama verib. Bildirib ki, hazırda 63 saylı Sabirabad seçki dairəsindən deputatdır: “Seçicilərimə mənə göstərdiyi etimada görə təşəkkür edirəm. Bildiyiniz kimi, hakim partiya o dairədən Elçin Quliyevin namizədliyini irəli sürüb. Belə olan halda mən o dairədən namizəd olmayacam. Elçin Quliyev ziyalı bir ailənin övladıdır, partiya düzgün seçim edib. O, hökumətdə məsul vəzifədə çalışırdı. Ailəsini də, özünü də şəxsən tanıyıram. O deputat olmağa layiqdir, Elçin Quliyevə uğurlar arzulayıram”.
Millət vəkili əlavə edib ki, hazırda ona həm beynəlxalq əhəmiyyətli, həm də ölkə daxilindən iş təklifləri gəlib: “Hələ ki, qərarımı verməmişəm. Hazırda məsləhələtləşmələr davam edir. Yaxın bir neçə gün ərzində başqa dairədən namizəd olub-olmayacağım tam aydınlaşacaq”.
Deputat həmçinin deyib ki, hazırda ölkədə çox gözəl seçki əhval ruhiyyəsi var: “Amma seçkilərə qısqanclıqla yanaşan qüvvələr var. Hər bir ölkənin demokratik prosesinin əsas meyarı seçkilərdir. Hesab edirəm ki, növbəti dəfə seçkiyə qısqanclıqla yanaşan qüvvələrin arzuları ürəyində qalacaq”.
